كانت اول
مرّة اشوف فيها عاطف الجوهرى .. يوم الثورة العالمية الأولى 15 أكتوبر 2011 حوالى
الساعة 9 م .. كان واقف فى صينية ميدان التحرير وبيتكلم مع الناس .. ومن كتر
إعجابى بكلامه وطريقته المميزة .. طلعت موبايلى من جيبى وفتحت الكاميرا وصورته
فيديو .. كنت حاسس ان الراجل بيقول كلام مايتفوتش ولازم احتفظ
بكلامه ده .. وكأنى كنت حاسس ان فى يوم من الأيام عاطف هيموت شهيد ويفضل كلامه معايا ذكرى ليه ..
عاطف الجوهرى فى الميدان يوم 15 اكتوبر 2011
تانى مرة
قابلته كان أيام محمد محمود فى الميدان يوم خطاب المشير .. وده يوم عمرى ما هقدر
أنساه .. كنت شامم كمية غاز مش طبيعية ومش شايف قدامى .. وفجأة لقيت عاطف فى وشى
بيقوللى: "خد تعالى .. أنا عارفك .. إنت راجل من رجالة الميدان" وإدانى
إزازة مية وعلبة عصير .. وإدانى رقم تليفونه وقالى لو إحتجت أى حاجة ابقى كلمنى ..
أنا استغربت لأنى عارف إنه ميعرفنيش كويس .. !! شكرته وقولتله يا ريت كل الناس زيك
.. ومشيت ..
بعد كدة
بقيت بشوفه كتير فى إعتصام مجلس الوزراء وقدام ماسبيرو وفى الميدان .. كنت
بروح أسلم عليه وكان فاكرنى بالإسم .. كنت ببقى فرحان جدا لما بشوفه وبحس ان مصر
لسة فيها ثوار بجد وناس بتحب بلدها بجد .. كنت كمان بحس بفخر انى اعرف شخصية زى
عاطف الجوهرى ..
عاطف كان
صوته مميز جدا .. لدرجة انى مرة سمعت صوته لفيت لقيته هو فعلا .. سلمت عليه
وقولتله عرفتك من صوتك ..
كنت بقعد
احكى مع صحابى عنه وأسمعهم صوته فى الفيديو اللى صورتهوله وأقلده وهو بيقول
"إحنا .. عملنا ثورة" بنفس طريقته ..
عاطف
الجوهرى استشهد يوم 2 مايو فى العباسية بطلقة
فى صدره من بلطجية المجلس العسكرى .. عاطف كان ثورجى أسفلت .. ناشط على حق .. راجل
من قلب الميدان وفاهم وواعى باللى بيحصل حوالينا كويس .. زى شهداء كتير ضحوا
بحياتهم عشان نعيش حياة أحسن ..
ولسة الدم
بيسيل فى الشوارع والميادين والقاتل حر طليق .. فى الجنة يا شهيد وهنفضل ورا حلمك
لحد ما يسقط حكم العسكر .
ضحكة الشهيد عاطف الجوهرى فى الميدان .. فى الجنة يا شهيد
انا شوفت عاطف من شهر ونص تقريبا فى القصير " البحر الاحمر " وكان معانا شاعتها مجموعة ظباط شيج متقاعدين ودار الحوار بين الجميع و بالفعل انبهرت بشخصية عاطف مع اننا كنا فى جبهة واحده بندافع عن الثورة والثوار وكنت متحفظ على اسلوبه شويه لانه كان بيهاجم دون ان يمنعه اى شئ .. كان مؤمن زى بأن الثورة لم تنجح وان طنطاوى وكلابه حرامية وان الثورة مستمره وكلام كتير جدا ... ربنا يرحمه
ردحذفحزينة لأني بأتعرف علي الابطال بعد وفاتهم هم و بسأل نفسي يا تري الاجيال اللي جاية ها تقدر تضحية الناس ديه ؟ و لا هاتعتبرها عبئ علي مناهج التاريخ لو كان عندنا الامانة و ذكرناهم,
ردحذفالحزن مش هيفيد .. المهم تفضلى فاكراهم وتعرفى بيهم أهلك وصحابك .. مش كل حاجة بتتكتب فى كتب التاريخ .. البشر هم التاريخ
حذفعموما الوقت لسه قدامك عشان تتعرفى عليهم.. إنزلى الميدان.. أى ميدان ونتى هتلاقى أحسن شباب فى مصر.. أو شهداء المستقبل
ردحذفالله يرحمه ..
ردحذفو يفككو من العسكر على خير ..
سلامي
اسمه عاطف فتحى عبدالفتاح وكان عريف متطوع فى الجيش اللواء 116 مش ميكا وكان حيكمدار لميز الظباط انا اعرفه شخصيا وزوهلت اول ما شقت صورته انا اتعلمت منه فنون الطبخ وكانت شهرنه فى الجيش الثالث يعاطف ماريكا بس استغرابى انه كان عريف متطوع وكان يسشتم فى المشير ؟
ردحذفالله يرحمه ويدخله فسيح جناته وهو من العمرانية
شكرا لمعلوماتك اللى عرفتنا أكتر بالشهيد عاطف :)
حذفاول يوم انهارده من يوم ما مات عاطف الله يرحمهاشوف صورته وافكر فيه بس ماعيطش بس لما قريت كلامك عيط الله يرحمه ليا معايا ذكريات كفاح لا يمكن انساها وهكمل ان شاء الله عشان اجيب حقه واحقق حلمه مش هسكت الا لما اروحله عشان لما اقبله اعرف ارد عليه واقوله انى عملت كل حاجه بس غصب عنى موت جتلك واكيد هو زى ما كان بيقف عشان الشهداءناس كتير هتقفله وانا اقولهم باذن الله
ردحذفكلامك أبكانى :( شكرا لمشاركتك وإنشاءالله حقه راجع هو وكل الشهداء ..
حذفصاحبى من اول ايام الثورة وطول عمرة مع الاعتصامات ودايما مع اسر الشهداء ودايما بيزور المصابين واخر كلامة هافضل اهتف ضد العسكر يسقط يسقط حكم العسكر اما العسكر يسقط او اموت شهيد كل مايروح شغل ويلاقى الدنيا ولعت ما بيستحملش بيسيب الشغل وجرى على التحرير وغالبا شغلة فى الغردقة والشهر اللى فات كان عامل انتر فيو علشان يشتغل فى سلسلة من اكبر المطاعم الايطالية و كان المرتب حوالى خمسين الف جنية فى الشهر وكان المتقدمين خمسين واحد محتاجين منهم ثلاثة وكان واحد من الثلاثة اللى تم اختيارهم وكان بيفكر مايقبلش علشان خايف يسيب الميدان واصحابة فى الميدان عاطف كان فى ايام كتير مابيباقش معاة فلوس يختفى اسبوعين ويرجع بفلوس يعوض العزايم اللى اتعزمها الاسبوعين دول على مركب فى البحر الاحمر مع جروب من السياح بياكلو من ايدة و بيوصو اصحابهم لما يجو مصر يسألو علية وكان اصحاب المراكب بيجيبوة علشلن مطلوب وبيشرفهم
ردحذفبعد احداث محمد محمود والواقعة الشهيرة بتاعة سحل المتظاهرين وتعرية البطلة المصرية وتكسير البطلة عزة هلال
اتعرف عاطف على عزة وهى لسة خارجة من المستشفى بعد مازارها هناك اكتر من مرة
ولالول مرة اشوف عاطف وهو جاى ومكسوف وموطى صوتة ودى مش عادتة خالص ......يا بشمهندس انا بحب عزة هلال وعايز اتجوزها صحكت وقلت لة مبروك يا عاطف اخيرا هاتعمل زى الناس وتحب وتتحب شد حيلك ياحبيبى
وشوية ويزعل عاطف من عزة وشوية ويتصالحو بس الحب مسيطر عليهم هما الاتنين وسافر عاطف الغردقة وهو زعلان من عزة زعل عبيط يعنى
وقبل مايرجع عاطف سافرت عزة الغردقة ورجعو مع بعض وانتهت كل المشاكل بينهم وكام يوم وابتدت احداث العباسية وضحك عاطف على عزة وقال انة رايح ينام علشان بقالة يومين فى العباسية ومنامش يومها قابلت عاطف فى الاعتصام و قعدنا نتكلم اكتر من ساعة مع بعض وسلمت علية وحذرتة ان فية ضرب هايحصل باليل واحنا مع ولاد ابو اسمعين اة بس مش هانموت علشانهم خليهم يجربو شوية احنا تعبنا كتير قبل كدة وخد بالك من نفسك
وصحيت الصبح على الخبر ولا حول ولا قوة اللا بالله الله يرحمك ياعاطف كنت نعم الاخ والصديق والصحبة والرجولة والشهامة والجدعنة والوطنية وانكار الذات
ربنا يرحمه كان من الثوار بصحيح وبيحب بلده صح .. شكرا جدا جدا على تعليقك .. والناس كلها لازم تعرف الكلام ده يا هندسة .. أعمل إيه ؟؟!!
حذفالثورة في قلوب الناس المظلومة والمقهورة والمهمشة الثورة التي تم الالتفاف عليها ثم الانقضاض عليها مازالت جريحة ومنهكة ولاكنها باقية حتى تتعافى وتقوم من جديد .. أما الوحوش الضارية والكلاب المسعورة وخفافيش الظلام التي هي على المسرح الآن لابد من القضاء عليها قضاء مبرما مهما كانت التكلفة ومهما طال الوقت حتى تعود مصر لأهلها مرة أخرى " المجد للشهداء والجرحى والمصابين والحريه للسجناء وتحيا ثورة المصريين 25 يناير "
ردحذف